Theme Joomla Pro Extensions

Nótunni 2012 lauk með tvennum glæsilegum tónleikum og lokaathöfn í Hörpu sunnudaginn 18. mars. Á tónleikunum voru flutt 24 tónlistaratriði frá tónlistarskólum víðsvegar af landinu af flytjendum á öllum aldri og á öllum stigum tónlistarnámsins. Á milli tónleika buðu tónlistarnemendur úr tónlistarskólum landsins upp á lifandi tónlist í anddyri Hörpu og hinir ýmsu aðilar voru með kynningar og uppákomur fyrir gesti og gangandi. Dagurinn var hinn skemmtilegasti og öllum tónlistarnemendum sem stigu á stokk á hátíðinni er óskað til hamingju með frábæra frammistöðu!

Hér má sjá lista yfir verðlaunahafa á lokatónleikum Nótunnar 2012.

Lokatónleikar Nótunnar 2012 fara fram sunnudaginn 18. mars í Eldborg í Hörpu. Nótan og Tónlistarsjóður Hörpu fyrir ungt fólk hafa gert með sér samstarfssamning til þriggja ára þess efnis að lokatónleikar hátíðarinnar fari fram í Hörpu. Sannkölluð hátíðarstemming verður í húsinu allan daginn en á milli tónleika Nótunnar bjóða tónlistarnemendur upp á lifandi tónlist í anddyri Hörpu, hljóðfæraverslanir og Epli.is leyfa gestum að skoða og prófa hin ýmsu hljóðfæri, tæki og tól, - allt frá íslenskri fiðlu og langspili til iPads. Boðið verður upp á hljóðfærasmiðju þar sem yngsta kynslóðin getur búið til sín eigin hljóðfæri og tekið með sér heim, nemendur frá Listaháskóla Íslands verða á staðnum sem og Tónlistarsafn Íslands og Samtök Listrænt Ágengra Tónsmiða Umhverfis Reykjavík sem munu grilla slátur o.fl.!

Dagskrá:  

11:00                     Lifandi tónlist í anddyri Hörpu

11:30                     Tónleikar I í Eldborg  / grunn- og miðnám

12:40                     Uppákomur í anddyri

14:00                     Tónleikar II í Eldborg / mið- og framhaldsnám

15:10                     Uppákomur í anddyri

16:30                     Lokaathöfn í Eldborg / afhending viðurkenninga

Þau níu atriði sem hljóta "Nótuna 2012" flytja atriði sín aftur á lokaathöfninni. Eitt framúrskarandi atriði fær farandgrip Nótunnar sem varðveitast skal í viðkomandi skóla til næstu hátíðar. Þá býðst verðlaunahafa að taka þátt í einum tónleikum Töfrahurðar árið 2012-2013.

Ólafur Ragnar Grímsson, forseti Íslands, flytur ávarp og afhendir „Nótuna 2012“

Allir velkomnir - aðgangur ókeypis!

Undirbúningur fyrir svæðisbundnu tónleika Nótunnar er í fullum gangi en þeir fara fram á eftirfarandi stöðum:

Fyrir Reykjavík: Laugardaginn 10. mars í sal FÍH.

Fyrir Vesturland og Vestfirði: Laugardaginn 10. mars í Tónlistarskólanum á Akranesi.

Fyrir Norður- og Austurland: Laugardaginn 10. mars í Menningarhúsinu Hofi á Akureyri.